ROJA NÛ Û EDEBIYATA KURDÎ YA GELÊRÎ - III_{Dûrik-Qewl-Lorî-Methelok-Mamik}

Cildê sêyem e “Roja Nû û Edebiyata Kurdî ya Gelêrî” ku ji Dûrik, Qewl, Lorî, Methelok û Mamikan pêk tê, derket. Berhem ji aliyê Necat Keskin ve hatiye amadekirin.

Rojnameya Roja Nû ji hêla Kamiran Bedirxan ve li Bêrûdê di navbera salên 1943-46an tê weşandin. Zimanê rojnameyê kurdî û fransî ye û bi tevahî 73 hejmar derçûne. Herçiqasî rojnameyeke siyasî be jî tê de têra xwe cureyên edebiyata kurdî ya gelêrî jî cih digirin. Ev yek jî wê hesasiyet û nêrîna Kamiran Bedirxan a li hemberî edebiyata gelêrî nîşan dide. Ji ber ku ev edebiyata gelêrî -ew wê wek edebiyata welatî jî bi nav dike- jîna milet e; hiş û heyata milet e; germ, rengîn, bibêhn û xwedan ronahî ye.

Cureyên edebiyata kurdî ya gelêrî ku di rojnameya Roja Nû de cih girtine me di 3 cildan de anîn cem hev. Di cilda pêşî de me cih dabû çîrok û serpêhatiyan û di ya duyem de jî me hinek cureyên helbesta gelêrî wek stran û şer kom kiribûn.

Ev xebata berdest jî cilda sêyem a dawî ye û tê de cureyên din ên helbesta gelêrî wek dûrik, qewl, lorî, û herweha çend mînakên cureyên din wek methelok û mamik cih digirin. Dîsa di vê cildê de jî, wek yên din, “destpêk”ek bo nirxandina cureyan cih digire.

Bi tevahiya vê xebatê, tenê me cureyên edebiyata kurdî ya gelêrî yên ku di rojnameya Roja Nû de cih girtine anîn cem hev; hêvî ew e ku yên din jî bi demê re bên tomarkirin û hemû tev rojekê arşîvekê bi xwe re ava bikin.